විශ්‍රාමය, ජීවිතයේ සුන්දර මෙන් නිදහස් ලෙස ගත කරන කාලයක් විය යුතුයි. අවාසනාවකට බොහෝ දෙනෙකුට, රැකියාවේ යෙදෙන කාලය තුළ තමන්ගේ විශ්රාම දිවිය පිළිබඳ නිසි සැලසුමක් නො තිබීම නිසාත්, අහිතකර මූල්‍ය කළමනාකරණ සහ ණය ලබාගැනීමේ පුරුදු නිසාත්, විශ්රාම සමයේ පවා ණය බරින් මිදීමට නොහැකිව පෙරටත් වඩා වෙහෙසින් හා සිතේ බරින් ගත කිරීමට සිදු වී තිබේ.
නිසි විශ්රාම සැලසුම් කරණය තුළ තමාගේ ආදායම් මාර්ග හඳුනා ගැනීම, වියදම් නිසි ලෙස ඇස්තමේන්තු කිරීම නිත්‍ය ඉතිරුම් වැඩසටහනක් පිළිපැදීම සහ තමාගේ වත්කම් සහ අවදානම් කළමනාකරණය කිරීම යන අංග ඇතුළත් විය යුතුයි. එමෙන්ම අනාගතයේ ඔබට ලැබිය හැකි ආදායම් නිසි ලෙස ඇස්තමේන්තු කිරීමෙන් ඔබගේ විශ්රාම ආදායම් ඉලක්ක ළඟා කර ගැනීමේ හැකියාව නිර්ණය කළ හැක.
විශ්රාම දිවියේ ප්‍රමුඛතම ඉලක්කය විය යුත්තේ මූල්‍යමය නිදහසයි. එම නිදහස ලබා ගැනීමට නම් ඔබ ඒ වන විට කර තිබෙන සියලු ඉතුරුම් සහ ආයෝජනයන් මගින් හිමි වන පොළී ආදායම, ඔබේ විශ්රාම සමයේ දෛනික වියදම් ගෙවා නිමි කිරීමට සෑහෙන ආදායමක් විය යුතුයි. සැලකිය යුතු තවත් වැදගත් කරුණක් තිබේ. එනම් මෙම විශ්රාම ආදායම ඔබගේ අනෙකුත් වගකීම් සහ ණය ගෙවා දැමීමෙන් අවසන් නොවිය යුතුයි.
ඕනෑම පුද්ගලයෙකුගේ රැකියා කාලයේ මුල් අවධි තුළ යම් ණය, උකස් අවදානමක්, ලබා ගැනීමට යොමු වීම සාමාන්‍ය කාරණාවකි. නමුත් ඔබේ ඉලක්කය විය යුත්තේ මෙම ණය මුදල් සියල්ල විශ්රාම වයසට පෙර ගෙවා නිම කිරීම ය
ඔබ සැලකිලිමත් විය යුතු ණය ක්රම කිහිපයක් පහත දැක්වේ
උකස් ණය
රැකියාවක් අරඹන බොහෝ දෙනාගේ මුල් ඉලක්කයක් වන්නේ තමාගේ ම කියා නිවසක් ගොඩ නගා ගැනීමයි. නිවසක් හෝ භූමියක් ඔබගේ ම උරුමයක් ලෙස ඔබට තිබේ නම් ඔබ වාසනාවන්තයි! එසේ නොමැති බොහෝ දෙනෙකුට තමා ගේම නිවසක් තනා ගැනීමට උපකාරී වන සුලබ ණය ක්‍රමයක් වන්නේ උකස් ණයයි. උකස් ණය සාමාන්‍යයෙන් ඉහළ අගයක් ගන්නා බැවින් එය හැකි ඉක්මනින් (අවම වශයෙන් ඔබගේ විශ්‍රාමයට ප්‍රථමයෙන්) ගෙවා අවසන් කිරීමට ඔබ වෙහෙසිය යුතුයි. ඔබේ රැකියාවේ ආදායම වර්ධනයත් සමඟ, ඔබට ගත හැකි තවත් ඥානවන්ත තීරණයක් වන්නේ ණය ගෙවීමේ කාල සීමාව හැකි තාක් කෙටි කර නැවත සකස් කර ගැනීමයි.
වාහන ණය
මෙය විශ්රාම දිවිය තුළ අනවශ්‍ය වගකීමක් හා බරක් විය හැකියි. ඔබේ විශ්‍රාමය අත ළඟ තිබිය දී ඔබේ රැකියාවේ සාර්ථකත්වය පදනම් කර ගනිමින්, ඔබේ සිහින මවන වාහනයක් මිල දී ගැනීමට ඔබට පෙලඹීමක් පැමිණිය හැක. නමුත් මතක තියා ගත යුතු වැදගත් කාරණාවක් වන්නේ සුඛෝපභෝගී වාහන මිල දී ගැනීම සඳහා ලබා ගන්නා අධික ණය මුදල් ගෙවා නිම කිරීමට යන්නා වූ කාලසීමාව ඔබේ විශ්රාම කාලය තුළටත් ගලා යන්නේ නම් එය විශාල මූල්‍යමය බරක් විය හැකි බවයි. මෙමගින් ඔබගේ මාසික විශ්රාම වියදම් උවමනාවට වඩා ඉහළ යවමින්, ඔබට දැරීමට අපහසු මූල්‍ය පීඩනයක් එල්ල විය හැක. සමහර විට ඔබට සමාගමේ වාහනයක් තිබුණේ නම්, විශ්‍රාමයට ආසන්නව ඔබේ ම කියා වාහනයක් මිල දී ගැනීමට ඔබ යොමු විය හැක. නමුත් මෙයත් ඔබේ විශ්රාම දිවිය තුළ මූල්‍යමය වෙහෙසක් ගෙන දෙන වියදමක් බවට පරිවර්තනය විය හැකි බව සිතේ තබා ගන්න.
