ඔබේ දරුවා ඖෂධවලට හෝ ආහාරවලට යම් අසාත්මික (Allergy) තත්ත්වයන් ඇති නම් එය වෛද්‍යවරයාට කීමට අමතක කරන්න එපා. දරුවාට ලබාදෙන ඖෂධ වලින් ඇතිවිය හැකි අතුරු ඵලයන් ගැනද වෛද්‍යවරයාගෙන් විමසන්න. එක් එක් ඖෂධය නියම කරන්නේ කුමන කාර්යයන් නිසාද යන්න ගැනත් යම් අදහසක් ඔබට තිබිය යුතුයි. එම නිසා එයත් අසා දැනගැනීම සුදුසුය.
හමේ බිබිලි ඇතිවීම, ක්ලාන්තය, වලිප්පුව, ශ්වසන අපහසුතා, මුත්‍රා සමඟ ලේ පිටවීම් වැනි ලක්ෂණ ඖෂධ ලබාදීමෙන් පසු ඇතිවන්නේ නම් වහාම එය දීම නවතා වෛද්‍ය උපදෙස් ලබාගන්න.
ඖෂධයක් ලබාදිමේ දී එය ලබාදෙන්නේ ආහාරයට පෙර ද පසුව ද යන්න දැන ගැනීම හා එය පිළිපැදීම ඉතා වැදගත් ය.
දියර වර්ග පෙවීමේ දී ප්‍රමාණය මැනීමේ දී ගෙදර දොර පාවිච්චි කරන භාජන පාවිච්චි කරන්න එපා. එවායින් මැනීම නිවැරදි නොවේ. එම නිසා බෙහෙත් බෝතලය සමඟ ඇති කුඩා කෝප්පය හෝ හැන්ද පාවිච්චි කර බෙහෙත් මනින්න.
එසේම දියර බෙහෙත් පෙවීමේ දී දරුවා නින්දේ සිටීමේ දී හෝ නිදිමතින් සිටින අවස්ථාවල දී බෙහෙත් පෙවීම කරන්න එපා. පෙවීමට හැන්ද, සිරින්ජරය, ඩ්‍රොපර් (DROPPER) යනාදිය භාවිතා කළ හැක. සිරින්ජරයක් (SYRINGER) මඟින් දත් හා කම්මුල අතර ඇති අවකාශයට සෙමින් දැමීමෙන් දරුවා එය පිටතට විසි කිරිමේ හැකියාව අවම වේ.
බෙහෙත ලබාදී විනාඩි 30ක් ඇතුලත දරුවා වමනය කරයි නම් එම බෙහෙත් එම ප්‍රමාණයෙන්ම නැවත ලබාදෙන්න. එම කාලය තුළ බෙහෙත් සම්පූර්ණයෙන් සිරුරට උරාගැනීමට අවකාශයක් නැති නිසා එය කිරීම අවශ්‍ය වේ.
බෙහෙත් ලබාදීමට කලින් බෝතලයේ අලවා ඇති ලේබලය දෙස බලා එය නිවැරදි ඖෂධය බව ස්ථිර කරගන්න. භාවිතයට කලින් බෝතලය සෙලවීමෙන් අවක්‍ෂේපනය වී ඇති බෙහෙත් සමානව දියරය තුළ පැතිරේ. එම නිසා සැම විටම බෙහෙත දිමට පෙර බෝතලය සොලවන්න.
බෙහෙත් පෙති වර්ග දිමේ දී දරුවා ඉතා කුඩා නිසා නම් පෙති ගිලීමට බලකරන්න එපා. එය කුඩු කර ජලයෙහි දියකර ලබාදෙන්න. දරුවා තරමින් ලොකු වුවද ඔහු/ඇය පෙති ගිලීමට අපහසු බව කියයි නම් පෙති ගිලීමට බලකරන්න එපා.
දරුවා බෙහෙත් බීම මුලුමනින් ප්‍රතික්ෂේප කිරීම කරයි නම්, ඔබ කලබල නොවන්න. දරුවාට තරවටු කිරීමට යන්න එපා. එහෙත් එම බෙහෙත ලබාදීමේ අවශ්‍යතාව සන්සුන්ව හා දැඩි ලෙස කියා සිටින්න. දිනපතා දිර්ඝ කාලයක් දෙන ඖෂධයක් නම් එය එදිනෙදා දින චර්යාවේ අංගයක් කරගන්න.
බෙහෙත් ගබඩාකර තැබීමේ දී දරුවාට ගත නොහැකි තැනක තැබිමට වගබලාගන්න. සමහර බෙහෙත් වර්ග දරුවාට විවෘත කළ නොහැකි බෝතල්වල අසුරා ඇති අතර වැඩිහිටියන්ගේ බෙහෙත් වර්ග ද දරුවාට අසු නොවන තැනක තබන්න. දරුවන්ගේ හා වැඩිහිටියන්ගේ බෙහෙත් එකම තැන තැබිමෙන් වළකින්න. දියර වර්ග හැම විටම එම අදාළ බොතලයේම තබන්න. දරුවාගේ බෙහෙත් දීමේ කාලසීමාව ඉවර වු පසු එම බෙහෙත් ඉවත දමන්න අමතක කරන්න එපා. දරුවා වැඩිහිටි අයගේ බෙහෙතක් බී ඇත්තනම් වහාම රෝහලට රුගෙන යන්න.
ළමා රෝග
විශේෂඥ වෛද්‍ය
සේපාලිකා ඉලංගකෝන්
(MBBS, DCH, MD)
මූලික රෝහල - මීරිගම
