1 වන ප්‍රශ්නය
මොහොතකට සිතන්න ඔබ තවමත් පසු කරන්නේ 2020 වර්ෂයේ ජනවාරි මාසයයි කියා. ඔබේ රැකියා ආයතනයේ ප්‍රධානියා එහෙමත් නැත්නම් බොස් ඇවිත් ඔබේ නම කියා, ඔබට නිවසේ සිට රැකියාව කරගෙන යාමට අපි පහසුකම් සලසා දුන්නොත් ඔබ ඊට කැමතියිද ? කියා ඇසුවොත් ඔබේ ප්‍රතිචාරය මින් කුමක් වනු ඇත්ද?
a) එය සතුටෙන් පිළිගැනීම
b) එය ප්‍රතික්ෂේප කිරීම
c) නින්දෙන් නැගිට සිහිනයක් යැයි දැනගෙන, එය සැබෑ වනවානම් යැයි සිතීම
බොහෝ දෙනෙකු තෝරාගැනීමට කැමැත්තක් දක්වනුයේ තෙවන උත්තරයයි.
2 වන ප්‍රශ්නය
නිවසේ සිට වැඩ කිරීම දැන් සැබෑවක් වී තිබේ. එය ඔබ අපේක්ෂා කල ලෙසම ඔබේ සිහිනය සැබෑ වීමක් ද?
ඔබට සහ තවත් බොහෝ දෙනාට මේ සඳහා පිළිතුර පළමු ප්‍රශ්නය තරම් සරල නොවනු ඇත
නිවසේ සිට වැඩ කිරීමේ පහසුව තමාට මෙතෙක් අත් නොදුටු නිවසේ වැඩ කටයුතු, පුද්ගලික සහ පවුල් වැඩකටයුතු යනාදී වගකීම් ඉටු කිරීමට බලාපොරොත්තු නොවූ මහත් නිදහසක් සලසා දී තිබෙනවා. නමුත් මෙහි සැඟවුණු කාරණා කිහිපයක්ද යම් පර්යේෂණ මගින් සොයාගෙන තිබෙනවා. එනම් නිවසේ සිට තම රාජකාරි කටයුතු කරන බොහෝ දෙනෙකුට, රැකියා ස්ථානයකට ඇවිත් වැඩ කරන්නන් හා සාපේක්ෂව වැඩි ආතතියක් ඇති බව සොයා ගෙන තිබිමයි.
නිවසේ සිට වැඩ කිරීමේ ආතතිය සඳහා හේතු
- නිවස සහ රැකියාවන් අතර සීමාවන් බොඳවී යාම
- නිසි සැකැස්මක්, දෛනික රටාවක් ගිලිහී යාම
- ජංගම උපාංග කෙරෙහි වැඩි යැපීමක්
- ශාරීරික ක්‍රියාකාරිත්වය අවම වීම
- සුපුරුදු නිදා ගැනීමේ කාල වේලාවන් වෙනස්වීම
- අවධානය එකාග්‍රව තබා ගැනීමට අපහසු වීම (තම නිවසේ සිටින දරුවන්, කලත්‍රයන්, හිත මිතුරන්ගේ අවශ්‍යතාවයන් නිසා)
- සමාජයෙන් හුදකලා වීම.
මෙම කාරණා ඔබේ ජීවිතයටත් බලපා ඇත්නම් ඒවා අභිබවා නිවසේ සිට වැඩ කිරීම, ධනාත්මක ප්‍රීතිමත් අත්දැකීමක් කරගැනීමට අපෙන් ඔබට පහත උපදෙස්
නිවසේ ජීවිතය සහ රැකියා ජීවිතය අතර පැහැදිලි මායිම් ගොඩනගාගන්න.
1) රැකියා වැඩ කටයුතු කර ගැනීමට නිවසේ එක් ස්ථානයක් පැහැදිලිව වෙන්කර ගන්න.
රැකියා වැඩකටයුතු කිරීමට පැහැදිලි ස්ථානයක් වෙන් කර ගැනීම අත්‍යවශ්‍යයි. මේ සඳහා මිලාධික උපාංග ඔබට අවශ්‍ය නෑ. අවශ්‍ය වන්නේ ඔබේ වැඩකටයුතු කිරීමට ස්ථිරවම නිශ්චිත ස්ථානයක් තෝරා ගැනීමයි. මෙය ඔබේ පවුල් ජීවිතයට අනිසි බලපෑම් එල්ල කිරීම වළක්වන අතර ඔබේ රැකියා ඵලදායිතාවයද ඉහළ නැංවීමට වැදගත්වේ.
2) ඔබේ නිදන කාමරය රැකියා වැඩ කටයුතු කිරීම සඳහා යොදාගැනීම තහනම්.
සිසිල් කාලයක හෝ උදෑසන ලැප්ටොප් යන්ත්‍රය සමග කාමරයට ගොස් වැඩ කිරීමට ඔබට පෙළඹවීමක් ඇති විය හැක. මෙය අනිවාර්යෙන් සිදු නොකළ යුතුයි. ඔබේ යටි හිත බොහෝ විට ක්‍රියා කරන්නේ, නොදැනුවත්වම ඔබ වටා පිටාවෙ ඇති භාණ්ඩ / පරිසරය පදනම් කර ගෙනයි. එබැවින් ඔබේ නිදන කාමරයේ ඇති යහන, කොට්ට මෙට්ට සියල්ල ඔබේ යටි හිතට නිදා ගැනීමට සූදානම් වීම සඳහා සංඥා නිකුත් කරන අතර ලැප්ටොප් යන්ත්‍ර, ජංගම දුරකථන වැනි ඔබ රැකියාව සදහා භාවිතා කරන උපකරණ ඔබේ යටි හිතට වැඩකටයුතු කිරීමට ඉඟියක් සලසයි, එබැවින් මෙවැනි උපාංග ඔබේ නිදන කාමරයේ තිබීම ඔබේ මනසට ආතතියක් කැඳවයි.
3) නිවාඩු ගැනීම අතපසු නොකරන්න.
නිවසේ සිට රැකියාවේ යෙදීම ඇරඹුණු දින සිට සුපුරුදු ලෙස නිවාඩු ලබාගැනීම බොහෝ දෙනා විසින් අතපසු කර ඇත. leave ලබා ගැනීම රැකියාවෙන් තොරව නිවාඩුවක් ලබා ගැනීම ඔබේ මනස තෘප්තිමත් කරන අත්‍යවශ්‍ය කාරණාවකි.
නිවසේ සිට රැකියාවේ යෙදීම ඇරඹුණ දින සිට පෙර පරිදි නිවාඩු ඉල්ලුම් කිරීම බොහෝ දෙනා විසින් අතපසු කර ඇති කාරණාවක්. කෙසේ වෙතත් නිවාඩුවක් ඉල්ලුම් කිරීම හරහා රාජකාරි කටයුතු වලින් විරාමයක් ලබා ගැනීම ඔබේ මනසට අත්‍යවශ්‍ය විවේකයක් ලබා දී රැකියා ඵලදායිතාව වැඩි වීමට හේතු විය හැක.
ඔබේ දින චර්යාවන් සැලසුම්ගත කරගන්න
4) කාල සටහනක් අනුගමනය කරන්න.
නිවසේ සිටම රැකියාව කිරීමට ලැබී ඇති පහසුව, ඔබ ඔබේ දෛනික කාලසටහන් දිනෙන් දින වෙනස් කර ගැනීමට ඔබව පෙළඹවිය හැක. කෙසේ වෙතත් ඔබේ නිදා ගැනීමේ කාල වේලාවන් දිනෙන් දින වෙනස් කිරීම ඔබ කිසි විටෙකත් නොකළ යුතුය. සැමදා නොවෙනස් වන්නා වූ නිදා ගැනීමේ චර්යාවක් තබා ගැනීම ඔබේ මානසික හා ශාරීරික සුවයට බෙහෙවින් වැදගත් වනු ඇත.
5) කලයුතු වැඩකටයුතු සටහන් කරගන්නා ලැයිස්තුවක් තබා ගන්න (To-Do- List).
නිවසේ සිට වැඩ කිරීම බොහෝවිට වෙනත් කාරණා සමග මිශ්‍ර විය හැක. එබැවින් දිනට අවසන් කළ යුතු වැඩකටයුතු ලැයිස්තුවක් ලෙස සටහන්කර ගැනීම ඔබට ඒ පිළිබඳ ව නිසි අවධානය යොමු කිරීමට පහසුවක් ගෙන දෙයි. එමෙන්ම ඔබ අවසන් කළ කාරණා ඉදිරියේ හරි ලකුණක් හෝ ඉරක් ගසා කපා දැමීම ඔබේ මනසට ඉහළ තෘප්තියක් ලබා දෙනු ඇත.
6) ශාරීරික ව්‍යායාම එකතු කරගන්න.
රැකියාවකට ගමන් කිරීමේදී නොදැනුවත්වම ඇවිදීමට, පඩිපෙළ නැගීමට වැනි ශාරීරික ක්‍රියාකාරිත්වයන් සඳහා ඔබව යොමු කරයි. නමුත් නිවසේ සිට වැඩකරන කළ එවැනි ක්‍රියාකාරීත්වයන් බොහෝවිට සිදු නොවේ. ඔබට හැකිනම් fitness tracker උපාංගයක් ගෙන ඔබේ එදිනෙදා ක්‍රියාකාරිත්වය මැන බලන්න. හැකිතාක් ව්‍යායාම සඳහා යොමු වෙන්න.
නිසි ශාරීරික ක්‍රියාකාරීත්වය නොමැති වීම බෝනොවන රෝග සඳහා ප්‍රධාන හේතුකාරකයක් බව ඔබ දැන සිටියාද? එමෙන්ම සුව නින්දක් ලබා ගැනීමටද නිසි ශාරීරික ක්‍රියාකාරීත්වය වැදගත්!
7) සමාජ ගනුදෙනු වැඩි කරගන්න.
රැකියා ආයතනයේ හිත මිතුරන් සමඟ කතා-බහේ යෙදීමෙන් ගොඩනැගෙනා කුලුපග බව බොහෝ දෙනාගේ මානසික ආතතිය ඉවත් කර ගැනීමට උපකාර වී තිබේ. එබැවින් සමාජ දුරස්ථභාවය රකිමින්, ඔබේ හිත මිතුරන් සමඟ ගත කරන කාලය වැඩි කර ගන්න.
ඔබ රැකියා ස්ථානයේ සිට වැඩ කළද, නිවසේ සිට වැඩ කළද රැකියාවක් ආශ්‍රිතව ආතතිය ඇතිවීම සාමාන්‍ය දෙයකි. එබැවින් නිවසේ සිට වැඩ කරන ඔබට මෙම උපකාරක සටහන් ප්‍රයෝජනවත් වූයේ යැයි අපේ බලාපොරොත්තුවයි. මේ සමගින් ඔබේ වැඩකටයුතු වඩා ඵලදායි සහ විනෝදාත්මකවේ යැයි අපි අපේක්ෂා කරමු.
