අපි හැමෝම නින්ද ගැන නොයෙකුත් කාරණා අසා තිබෙනවා. එවැනි අපට අසන්නට ලැබෙන කාරණා සහ ඒවායේ සත්‍ය, අසත්‍ය, විද්‍යාත්මක ව පැහැදිලි කිරීමටයි දැන් අපේ සුදානම.
1 වන මිථ්‍යාව: වයසට යාමත් සමග අපට අඩු නින්දක් අවශ්‍ය වේ
සත්‍යය: තරුණ වියේ මෙන්ම වයසට යෑමේදී ද අපට දිනකට අවශ්‍ය සමස්ත නින්දේ ප්‍රමාණය වෙනස් නොවුවත් සමහරුන් ට මහළු වයසේ දී අඛණ්ඩව නිදා ගත හැකි හැකියාව අඩු වීමේ ප්‍රවණතාවක් දැක ගත හැක. ඒ හේතුවෙන් වයසට යත්ම රාත්‍රි කාලයේ නිදන ප්‍රමාණය තරුණ වයසට සාපේක්ෂව අඩු වුවත් දහවල් කාලය තුළ නින්දක් ලබා ගැනීමෙන් දිනකට අවශ්‍ය සමස්ත නින්ද ලබා ගැනීමට ඔවුන් හුරු පුරුදු වේ.
2 වන මිථ්‍යාව: සෑම කෙනෙකුට ම පැය අටක නින්දක් අවශ්‍යයි
සත්‍යය: ප්‍රශස්ත සෞඛ්‍යය ප්‍රවර්ධනය කිරීම සඳහා වැඩිහිටියන් නිතිපතා රාත්‍රියට පැය 7 ක් හෝ ඊට වැඩි කාලයක් නිදා සිටිය යුතු බව ඇමරිකානු නින්ද වෛද්‍ය ඇකඩමිය නිර්දේශ කරයි. ළමයින්ට සහ යෞවනයන්ට ඊටත් වඩා නින්ද අවශ්‍යයි. කෙසේ වෙතත්, එක් එක් පුද්ගලයාට අවශ්‍ය කරන නින්දේ ප්‍රමාණය ඒ ඒ පුද්ගලයාගේ ජානමය ස්වභාවය, ජීවන රටාව, සෞඛ්‍ය තත්ත්වය හා පාරිසරික සාධක යන නොයෙකුත් කාරණා මත ද තීරණය විය හැකියි.
3 වන මිථ්‍යාව: සතියේ දින තුළ අතපසු වූ නින්ද සති අන්තයේ නැවත ලබා ගත හැකයි
සත්‍යය: නිදා නො ගැනීම තුළින්, ඔබේ ශරීරයට අතපසු වූ නින්දේ (ගෙවිය යුතු 'නිදි ණය') ප්‍රමාණය අනුව ඔබට එය සති අන්තය තුළ පියවා ගැනීමට හැකියාව තිබේ ද, නොතිබේද, යන්න තීරණය වනු ඇත. මෙම ක්‍රමය සාමාන්‍යයෙන් අනුමත නො කෙරෙන නමුත් සතිය පුරා ඔබට නිසි ලෙස නිදා ගැනීමට අවස්ථා නො ලැබේ නම්, අවම වශයෙන් සති අන්තය තුළ එසේ ඒක රාශි වූ නිදි ණය පියවා ගැනීම මගින් ඉදිරි සතියෙහි ක්‍රියාකාරී ව සිටීමට පහසු වනු ඇත. නමුත් මෙම අක්‍රමවත් නිදා ගැනීමේ ජීවන රටාව ඔබගේ අභ්‍යන්තර ශාරීරික ක්‍රියා පිළිවෙත් අවුල් කළ හැකි බැවින්, දිනපතා සුපුරුදු වේලාවට නිදා ගැනීමට යම් යම් අපහසුතාවක් හට ගත හැක.
4 වන මිථ්‍යාව: රාත්‍රී රූපවාහිනිය නැරඹීම නිදා ගැනීමට රුකුලකි
සත්‍යය: සමහර අයට රූපවාහිනියේ හඬ නිදා ගැනීමට උපකාරයක් විය හැකියි. නමුත් රූපවාහිනි වැඩසටහනෙහි වෙනස් වන ශබ්ද ප්‍රමාණය සහ පිටවන ආලෝක ධාරාවන්ගේ විචලනයත් ඔබගේ නින්දේ ගුණාත්මක භාවයට අහිතකර ලෙස බලපෑ හැකි අතර රාත්‍රි කාලයේ හදිසියේ අවදි වීමටත් මෙය හේතුවක් විය හැක.
