ඔබේ ශරීරයේ සහ මොළයේ ක්‍රියාකාරිත්වය උපරිම තත්ත්වයක පවත්වා ගැනීමට නම් නිසි නින්දක් ලබා ගැනීම අත්‍යවශ්‍ය වේ! අප බොහෝ දෙනා අපගේ ජීවන රටාවේ මෙම වැදගත් අංගය නොසලකා හැරීමට තරම් නැඹුරු වී ඇත්තේ රැකියාවේ සහ නිවසේ ඇති කාර්ය බහුලත්වය හේතුවෙනි. නමුත් නිසි නින්ද ඔබේ ශරීරයට අත්‍යවශ්‍ය බව පහත කරුණු මගින් ඔබට මතක් කර දීමට කැමැත්තෙමු.
1. ඔබේ බර පාලනය කර ගැනීමට
අපගේ ආහාර රුචිය පාලනය කරන ගර්ලින් සහ ලෙප්ටින් හෝමෝන මුදා හැරීමේ සාමාන්‍ය ක්‍රියාවට නින්ද නොමැතිකම අහිතකර ලෙස බලපායි. මේ හේතුවෙන් අපට නිතරම කුස ගින්න දැනේ. එපමණක් නොව නින්ද නො ලැබීම නිසා ඔබේ ශරීරය තුළ ආතතිය හා සම්බන්ධ කෝටිසෝල් හෝමෝනය මුදා හැරේ. එමගින් ඔබේ ශරීරයේ සෛල වැඩි වශයෙන් මේද ගබඩා කිරීමට යොමුවේ.
2. ඔබේ සමාජ ජීවිතය වැඩි දියුණු කරයි
නින්ද මද කම නිසා ඔබ නිතර කෝප වීමට, කලකිරීමට හෝ මානසික අවපීඩනයට ලක් විය හැක. ඇත්ත වශයෙන්ම, ධනාත්මක හා ඍණාත්මක හැඟීම් නියාමනය කිරීමේ අපගේ හැකියාවට අපගේ නින්ද ඍජු ලෙස බලපාන අතර එමගින් අප අනෙක් පුද්ගලයින් සමඟ කටයුතු කරන ආකාරය කෙරෙහි ද බලපායි.
3. ඔබේ මතක ශක්තිය සහ ක්‍රියාකාරිත්වය වැඩි දියුණු කරයි
නින්ද නො ලැබීම හේතුවෙන් යම් කාරණා අමතක වීම හෝ ඔබේ ප්‍රතිචාර වේගය මන්දගාමී වීම පිළිබඳ ව ඔබ කලකිරීමට පත්ව තිබේ ද? අවධානය යොමු කිරීමට, ගැටළු විසඳීමට සහ වැදගත් තොරතුරු සිහිපත් කිරීමට ඔබට ඇති හැකියාව යහ තත්ත්වයේ පවත්වා ගැනීමට නම් ඔබට නින්ද අත්‍යවශ්‍ය වේ.
4. ඉදිමුම් හා සෞඛ්‍ය අවදානම අවම කරයි
නින්ද නොමැතිකම ඔබේ ශරීරයේ ඉදිමුම් වැඩි කරයි. ඒ හේතුවෙන් හෘද රෝග, දියවැඩියාව වැළඳීමේ අවදානම ඉහළ නැංවෙනු ඇති අතර ආතරයිටිස් සහ වෙනත් ඉදිමුම් ආශ්‍රිත රෝග ලක්ෂණ ද තීව්‍ර විය හැක.
5. ඔබේ ක්‍රියාශීලී භාවය ඉහළ නංවයි
සුව බර රාත්‍රි නින්දක්, ඔබට දවස පුරා වඩාත් ජව සම්පන්න හා ක්‍රියාශීලී හැඟීමක් ඇති කරයි. එමෙන්ම ඔබගේ වැඩකටයුතු කඩිනමින් සම්පුර්ණ කිරීමටත් අභියෝග මුහුණ දීමට වැඩි සුදානමක් ද ඔබ තුළ ඇති කරයි. ප්‍රමාණවත් නින්දක් ඔබේ ක්‍රියාවන්ගේ වේගය, නිරවද්‍යතාවය, ප්‍රතික්‍රියා කාලය වැඩි දියුණු කරන අතර ඔබේ සමස්ත ශාරීරික යහපැවැත්ම ද වැඩි දියුණු කරයි.
