AIA රක්ෂණ සමාගමේ AIA Premier Agency Circle (PAC)හි, සමාරම්භක උළෙල එම සමාගමේ කලාප ප්‍රධාන විධායක නිලධාරී බිල් ලයිල්, ප්‍රධාන විධායක නිලධාරී පංකජ් බැනර්ජි සහ නියෝජ්‍ය ප්‍රධාන විධායක නිලධාරී උපුල් විජේසිංහ යන මහත්වරුන්ගේ ප්‍රධානත්වයෙන් යුතුව නොබෝදා පවත්වන ලදී. AIA හී විශිෂ්ට හැකියාවන් පෙන්නුම් කරනා නව අලෙවි කරුවන් සඳහාම සුවිශේෂී වූ මෙම PAC කාර්යාලය, කොළඹ නගරය කේන්ද්‍ර කරගත් ප්‍රධාන ව්‍යාපාර මධ්‍යස්ථානයක ස්ථාපිතව ඇත.
සිය දේශය නියෝජනය කරමින් ලොව ප්‍රධාන පෙලේ රක්ෂණ අලෙවිකරුවන් විසින් අත්පත් කරගන්නා වූ Million Dollar Roundtable Table (MDRT) වැඩසටහනෙහි ගෞරවනීය සාමාජිකත්වය ලඟාකර ගැනීමේ හැකියාව සහිත පුර්ණ කාලීන සේවයෙහි නියුතු විශිෂ්ට අලෙවි බලකායක් ගොඩනංවා ගැනීමේ ප්‍රධාන අරමුණින් යුතුව AIA Premier Agency Circle කාර්යාලය ආරම්භ කරන ලදී. මෙම සංකල්පයෙහි ප්‍රධානතම අරමුණ වන්නේ ඉහල අලෙවි ප්‍රවර්ධනයන් දිරිමත් කිරීම සහ ඉහල පෙළේ ශ්‍රී ලාංකීය සේවාලාභීන් පිරිස වෙනුවෙන් සේවය සැපයීම සඳහා පුර්ණ කාලීන වෘත්තිමය අලෙවි බලකායක් ගොඩනැගීමයි.
නියෝජ්‍ය ප්‍රධාන විධායක නිලධාරී උපුල් විජේසිංහ මහතා අදහස් දක්වමින් “PAC සඳහා බඳවා ගන්නා වූ අලෙවි වෘත්තිකයින් සඳහා පුහුණු කටයුතු සිදු කෙරෙනුයේ PAC අලෙවි වෘත්තිකයින්ටම වෙන්වූ නවීනතම ඩිජිටල් තාක්ෂණයෙන් බලගැන්වූ විශේෂ පුහුණු මධ්‍යස්ථානයකයි. AIA Premier Agency Circle, ශ්‍රී ලංකාවේ පළමු වරට ක්‍රියාත්මක කරන ලද පුර්ණ කාලීන අලෙවි වෘත්තිකයින් ගොඩනැගීමේ සංකල්පයක් වීම මෙහි ඇති තවත් විශේෂත්වයකි” යන්න ප්‍රකාශ කරන ලදී.
AIA ශ්‍රී ලංකා සමාගමේ AIA Premier Agency Circle හි ප්‍රධානි ශමාල් ප්‍රනාන්දු මහතා මෙසේ සිය අදහස් දැක්වීය, “MDRT, ජිවිත රක්ෂණ සහ මුල්‍ය සේවා ව්‍යාපාරයන්හි විශිෂ්ඨ කුසලතාවයන් ඇති අලෙවි වෘත්තිකයින් ඇගයීමට ලක්කරන්නාවූ මිනුම් දණ්ඩක් සේ ලොව පුරා පිළිගැනේ. මෙම වැඩසටහන සඳහා සහභාගී වීමට හිමිකම් කියන්නා වූ සාමාජිකයින් විසින් කැපී පෙනෙන ආචාර ධර්මයන්ගෙන් යුත් සේවාලාභී සේවාවන් මෙන්ම විධිමත්, උසස් තලයේ කාර්ය සාධනයක් සහ සුවිශේෂී වෘත්තිමය දක්ෂතාවයන්ද පෙන්නුම් කල යුතුයි. සැලකියයුතු කාරණාවක් වන්නේ, වසර දෙකක කාලයක් පුරාවට අඛණ්ඩව ශ්‍රී ලංකාවේ MDRT සාමාජිකයින් වැඩිම ප්‍රමාණයක් බිහි කරන ලද සමාගම ලෙස AIA ශ්‍රී ලංකා ඉදිරියෙන් සිටීමයි. කෙසේ වෙතත් අපගේ පාරිභෝගික භවතුන් වෙනුවෙන් තවදුරටත් ඉහළ මෙන්ම ගුණාත්මක සේවාවන් සහතික කිරීම සඳහා ශක්තිමත් අලෙවි බලකායක් නිර්මාණය කිරීම අපගේ අරමුණයි. සේවාලාභින් කේන්ද්‍රගත කරගනිමින් නවතම මෙන්ම ඉහල ඝණයේ කාර්යශුර අලෙවි නියෝජිතයින් පිරිසක් ගොඩනැංවීම අපගේ මහත් වෑයමයි”
